Koʻza

Koʻza — roʻzgʻor buyumi; suv va b. suyuqliklar solish, tashish, saqlashda ishlatiladigan idish. Tagi va boʻgʻzi tor, qorni keng , dastali. Oʻrta Osiyoda sopol va m i s K.lar keng tarqalgan. Aksariyat hollarda sopol K.lar pishirilmasdan oldin chizib naqshlanadi. Sopol K.ning ichi sirlanadi (sirlan-magani ham boʻladi). Sopol K.ning koʻp ishlatiladigan dastasiz turi moʻndi deb ataladi. Mis K. sopoldan tayyorlanganidan shakl jihatidan keskin farq qiladi. Mis K. joʻmraksiz obdastani eslatadi: boʻyni ingichka, bir quloqli, qorni keng , pastga tomon kengayib boradi. Tagida keskin konusga oʻxshash pastak chambaragi bor. Murakkab shakldagi mis K.ning avval ayrim boʻlaqlari quyilib, soʻng ular birbiriga qalaylanadi. K.ni koʻzagar kulol yoki miskar tayyorlaydi, boʻyama (sopol K.) va uyma (metall K.) naqshlar bilan bezatiladi. Metall K. ning oltin, kumushdan ishlanib, kandakori naqshlar bilan bezatilgan, baʼzan qimmatbaho toshlar qadalgan namunalari respublika va chet mamlakatlar muzeylarida saqlanadi.