Gulnoz Tojiboyeva (yozuvchi)
Tojiboyeva Gulnoz Zohidullo qizi (oʻzbekcha: Тожибоева Гулноз Зоҳидулло қизи; 1991-yil 8-fevral, Toshkent) — bolalar yozuvchisi, ssenariy muallifi, tarjimon, dizayner, taʼmirshunos-rassom. O‘zbekiston Badiiy akademiyasi, Badiiy ijodkorlar uyushmasi aʼzosi (2019). O‘zbekiston „Milliy tiklanish“ demokratik partiyasi aʼzosi (2021). O‘zbekiston Yozuvchilar uyushmasi aʼzosi (2022).
| Tojiboyeva Gulnoz Zohidullo qizi | |
|---|---|
 | |
| Asl ismi | Тожибоева Гулноз Зоҳидулло қизи |
| Tavalludi |
8-fevral 1991-yil |
| Fuqaroligi |
 Oʻzbekiston |
| Yoʻnalish | bolalar yozuvchisi |
| Shoh asari |
"Topishmoqlar" "Sayohatchi kemacha" |
Tarjimai holi tahrir
1991-yil 8-fevral kuni Toshkent shahrida tug‘ilgan. Yozuvchi Muhabbat Yoʻldoshevaning farzandi[1]. 2019-yildan O‘zbekiston Badiiy Akademiyasi va Badiiy ijodkorlar uyushmasi, 2021-yildan Milliy tiklanish demokratik partiyasi, 2022-yildan O‘zbekiston yozuvchilari uyushmasi aʼzosi. Hozirda uyushma „Bolalar va o‘smirlar adabiyoti“ kengashi raisining o‘rinbosari va qator Xalqaro adabiy jurnallarning O‘zbekistondagi adabiy koordinatori.
Ijodi tahrir
6 yoshidan ertaklar yoza boshlagan. 2008-yilda Zominda o‘tkazilgan O‘zbekiston yosh yozuvchilar Respublika seminarida „Bolalar adabiyoti“ nominatsiyasi bo‘yicha g‘olib bo‘lgan.
Bolalar va o‘smirlarga mo‘ljallangan 9 ta kitob muallifi: „O‘rmon ertaklari“ (2006), „Kuladigan quyoncha“ (2008), „O‘rmon alifbosi“ (2012), „Topishmoqlar“ (2012), „Jayhun va Alanga“ (2018), „O‘rmon alifbosi“ (2018), „Epchil zag‘izg‘on“ (2021), „Sayohatchi kemacha“ (2022) va „Mehmondo‘st olmaxon“ (2022)[2].
Ertaklari „Gulxan“, „G‘uncha“, „Tong yulduzi“, „Klass“ va boshqa qator nashrlarida chop etilgan. Bundan tashqari, rus, qozoq, qirg‘iz va ingliz tillariga tarjima qilinib, ertak va hikoyalari AQSh[3], Rossiya, Ukraina, Donetsk Xalq Respublikasi, Pokiston, Bangladesh, Belgiya va Qrim Muxtor Respublikasidagi adabiy nashrlarda chop etilgan.
2014-yilda O‘zbekiston va Koreya Respublikasi hamkorligida o‘tkazilgan „O‘rta Osiyo mamlakatlari mif, ertak va dostonlari“ xalqaro tanlovida o‘zining „Jayxun va Alanga“ nomli kinofilm ssenariysi bilan faxrli 1-o‘rinni egalladi.[4]
O‘zbekiston hududi — Qanqadan topilgan 10 dan ortiq qadimiy arexologik sopol buyumlarni taʼmirlab, qayta tikladi va 2016-yilda Ikuo Hirayama nomidagi Xalqaro madaniyat karvonsaroyida o‘tkazilgan „Ajdodlar merosi“ yillik hisobot ko‘rgazmasida namoyish etdi.
2019-yilda o‘tkazilgan „Humo-2019“ Xalqaro ertaklar ko‘rik-tanlovining asoschisi va hakamlar hay’ati aʼzosi.[5]
20dan ortiq badiiy filmni o‘zbek tiliga tarjima qilgan.
Ukrainaning „Avtograf“ adabiy jurnalida shoira Zulfiya Mo‘minovaning „Toshbaqa Toshbuvining ko‘zoynagi“ va „Qarg‘acha Qoratosh qanday qilib o‘ziga ota-ona izladi“ kabi ertaklari, bolalar shoiri Orif To‘xtashning „G‘iybatchi chumchuq“ nomli ertagi Gulnoz Tojiboyevaning tarjimasi va rasmlari asosida chop etilgan.