Beruniy koʻchasi (Toshkent)

Beruniy koʻchasi (Beruniy shoxkoʻchasi) — Shayxontohur tumanida, Chorsu maydoni bilan Farobiy koʻchasi oraligʻida.

Beruniy koʻchasi

Umumiy maʻlumotlar
Mamlakat	Oʻzbekiston
Shahar	Toshkent
Tuman	Shayxontohur
Uzunligi	3 km
Yaqin metro bekatlari	Tinchlik Beruniy
Kim sharafiga nomlangan	Abu Rayhon Beruniy
Koʻchada joylashgan binolar	"Jar" sport majmuasi Eskijoʻva dehqon bozori Shayxontohur tumani xalq sudi Respublika koʻrgazma savdo markazi

Uzunligi 3 km atrofida. Hozirgi „Yoshlik“ talabalar shaharchasi hududida dastlab (oʻtgan asrning 1960-yillari) Xalq xoʻjaligi yutuqlari koʻrgazmasi (vistavkasi) qurilishi boshlangan, shu munosabat bilan bogʻ-rogʻlar oʻrniga ushbu koʻcha ochilgan va Vistavka koʻchasi deb nomlangan. Keyinchalik vistavka qurilishi toʻxtatilib, oʻrniga Toshkent universiteti (hozirgda Oʻzbekiston milliy universiteti) korpuslari qurilgan. Abu Rayhon Beruniy tugʻilgan kuniga 1000-yil toʻlishi munosabati bilan 1973-yilda koʻchaga Beruniy nomi qoʻyilgan. Beruniy koʻchasida 1970-80-yillarda katta qurilish ishlari olib borilib, Bogʻkoʻcha dahasi (27-kvartal), Gulobod dahasi (26-kvartal), „Orzu“ charm-galantereya va sport buyumlari i.ch. birlashmasi va uning qarshisida 9 qavatli turar joy binolari, Beruniy maydoni bunyod etildi.

Mustaqillik yillarida Beruniy koʻchasida bunyodkorlik ishlari davom ettirilib, "Jar" sport majmuasi, Eskijoʻva dehqon bozori, Respublika koʻrgazma savdo markazi qurildi. Koʻcha yoʻnalishida yuqorida sanalganlardan tashqari, turar joy binolari, „Oʻzgazloyiha“ AJ, „Gʻuncha“ kinoteatri, „Oʻzgazoyl“ avtomobilga yonilgʻi quyish shoxobchasi, Shayxontohur tumani xalq sudi, „Mashhura“ firmasi, maktab, kitob doʻkoni, „Humo-sarbon“, „Versal“, „Registon“, „Tinchlik“, „Huvaydo“, „Beruniy“ va „Alpomish“ restoran-toʻyxonalari, savdo doʻkonlari, maishiy xizmat koʻrsatish shoxobchalari bor.

Koʻchasida „Tinchlik“, „Beruniy“ metro bekatlari joylashgan.

Yana qarang

• Toshkent koʻchalari roʻyxati