Farmer Genri Jorj

Farmer Genri Jorj- (1882-yil 17-yanvar, Birr, Irlandiya – 1965-yil, 30-dekabr, Karluk, Lanark grafligi) – ingliz musiqashunosi, dirijyor, kompozitor. Yevropada musiqiy sharqshunoslik fanining asoschilaridan. Glazgo universitetini tugatgan (1910). Angliyaning turli teatrlarida dirijyor (1910—1947), Glazgo universiteti oʻqituvchisi va kutubxonaning musiqiy boʻlimi mudiri (1934-yildan). 1916-yildan Sharq xalqlari musiqa madaniyati, xususan, Farobiy, Ibn Sino va boshqalarning musiqa risolalarini oʻrganib, Yevropa va Osiyo mamlakatlarida maʼruzalar oʻqigan, oʻnlab kitoblar nashr etgan („Arab musiqasi tarixi XIII asrgacha“, 1929; „Sharq musiqa cholgʻulari“, 1931; „Islom musiqasi“, 1957 va boshqalar).