Frustratsiya (lot. frustratio — addanish, rejalarning barbod boʻlishi) — muammoni hal qilish yoki maqsadga erishish yoʻlidagi faoliyatni izdan chiqaruvchi ruhiy holat. U kishining maqsadga erishishi yoʻlida uchraydigan, obʼyektiv ravishda yengib boʻlmaydigan yoki subʼyektiv ravishda shunday tuyuladigan qiyinchiliklar tufayli paydo boʻladi. F.ni keltirib chiqaruvchi sabablar frustrator deyiladi. F. holati frustratorning kuchiga, jadalligiga bogʻliq. F. holatida shaxsning vaziyatni toʻgʻri baholash qobiliyati muhimdir. Shu bois turmushning nokulay taʼsirlariga qarshi kurashish uchun odam feʼlatvorida barqarorlikni shakllantirish lozim. F. ham boshqa ruhiy holatlar singari kishi feʼlatvoriga xos yoki yangi xislatlarning boshlanishini koʻrsatuvchi, shuningdek, oʻtkinchi holat boʻlishi mumkin. F., asosan, salbiy hissiyotlar uygʻotadi. F.ning turlari: tajovuzkor holat, apatiya, depressiv holat, gʻamginlik tuygʻusi, oʻziga ishonmaslik, kuchsizlik, maʼyuslik va boshqa F.ning tajovuzkor holati koʻpincha oʻzini tuta olmaydigan, qoʻpol odamga xos boʻlsa, depressiya holati oʻziga ishonmaydigan shaxsga taalluklidir. Baʼzan ogʻir tabiatli kishilarda ham shu xiddagi holatni vujudga keltirish mumkin, lekin bu vaziyat uzoqqa choʻzilmaydi.