Mavlono Vaysiy
Mavlono Vaysiy (XV asr) – fors-tojik tilida ijod qilgan xurosonlik kotib va shoir. Nomi “Majolis un-nafois”ning[1][2] ikkinchi majlisida tilga olinadi. Alisher Navoiy uning juda sodda kishi boʻlganligini, zamona ahli uning bu qadar soddalik bilan qanday sheʼr aytishi mumkinligidan ajablanishlari haqida yozar ekan, “gʻazallari yomon ermas erdi va devoni ham bordur”, deydi. Mavlono Vaysiy safar chogʻida vafot etgan. “Majolis un-nafois”da uning quyidagi bayti keltirilgan:
Raftam ba sayri bogʻu
tavofi bunafshazor,
Omad zi har bunafsha
maro boʻi zulfi yor.
(Mazmuni: Bogʻ sayriga, binafshazorni aylanishga chiqdim va har bir binafshadan yorim sochlari isini tuydim).