Oʻzbek tilining kirill va lotin alifbolaridagi imlo lugʻati
„Oʻzbek tilining kirill va lotin alifbolaridagi imlo lugʻati“ — oʻzbek tilining 14 000 dan ortiq soʻz kiritilgan kirill va lotin alifbolaridagi imlo lugʻati. Lugʻatni Toʻlqin Togʻayev, Gulbahor Tavaldiyeva va Muyassar Akromovalar tuzgan. Lugʻat 1999-yil Toshkent shahrida Davlat va jamiyat qurilishi akademiyasi tomonidan „Sharq“ nashriyot-matbaa aksiyadorlik kompaniyasi bosh tahririyatida chop etilgan. Lugʻat kirill yozuvidagi „Oʻzbek tilining izlohli lugʻati“ (1981) hamda lotin yozuvidagi „Oʻzbek tilining imlo lugʻati“ (1995) kabi lugʻatlar asosida tuzilgan.
| Muallif(lar) |
Toʻlqin Togʻayev Gulbahor Tavaldiyeva Muyassar Akromova |
|---|---|
| Til | oʻzbekcha |
| Janr(lar)i | imlo lugʻati |
| Nashriyot | „Sharq“ nashriyot-matbaa aksiyadorlik kompaniyasi bosh tahririyati |
| Oʻzbek tilida nashr etilgan sanasi | 1999 |
| Sahifalar soni | 368 |
Ushbu lugʻat kirillcha va lotincha oʻzbek alifbolarida tuzilgan boʻlib, ayni soʻz har ikki yozuvda yonma-yon berilgan. Lugʻat kirillcha-lotincha oʻzbek yozuvi tamoyilida tuzilganligi sababli, soʻzlar oʻzbek kirill alifbosi tartibida berilgan. Lugʻatning kirill alifbosidagi qismi oʻzbek kirill yozuvi boʻyicha 1956-yil 4 aprelda qabul qilingan qoidalarga, lotin yozuvidagi qismi esa oʻzbek lotin yozuvi boʻyicha 1995-yil 24-avgustda qabul qilingan qoidalarga tayangan holda tuzilgan.
Lugʻatni nashrga tayyorlashda quyidagi shaxslar ishtirok etgan: Karim Nazarov – maxsus muharrir, Barnobek Eshpoʻlatov – muharrir, Diana Gabdraxmanova – texnik muharrir, Xurshid Ziyoxonov – badiiy muharrir, Yulduz Bizaatova, Nozima Muhammadiyeva – musahhihlar, Mixail Samoylov – musavvir, Roza Bayazitova – komputer taʼminotchisi. Kitob adadi – 5 000 nusxa.