Palvan Kalandarov
Palvan Iskandarovich Kalandarov (1955-yil, Urganch, Xorazm viloyati, Oʻzbekiston SSR) — oʻzbekistonlik olim, texnika fanlari doktori, professor.
| Palvan Kalandarov | |
|---|---|
 | |
| Tavalludi |
1955-yil Urganch, Xorazm viloyati, Oʻzbekiston SSR |
| Fuqaroligi |
 Oʻzbekiston |
| Ish joylari | Toshkent irrigatsiya va qishloq xoʻjaligini mexanizatsiyalash muhandislari instituti |
| Taʼlimi | Toshkent politexnika instituti |
| Ilmiy darajasi | texnika fanlari doktori |
| Ilmiy unvoni | professor |
Biografiyasi
tahrirPalvan Kalandarov 1955-yilda Urganch shahrida tugʻilgan. 1981-yil Toshkent politexnika institutini „Sovutgich va kompressor mashinalari va qurilmalari“ ixtisosligini bitirib, mexanik-muhandis malakasini olgan. 1996-yildan texnika fanlari doktori. Ish faoliyatini 1981-yilda Toshkent politexnika instituti „Sovutgich va kompressorlari va qurilmalari“ kafedrasida assistent lavozimidan boshlagan. 1981—1989-yillarda Toshkent politexnika instituti mexanika mashinasozlik fakultetini komsomol komiteti kotibi, institut talabalar uyushmasi kasaba uyushmasi raisi, partiya komiteti kotibi lavozimlarida ishlagan. 1981-1986-yillarda Toshkent politexnika instituti, keyinchalik mashinasozlik institutida „Sovutgich va kompressor mashinalari va qurilmalari“ kafedrasida assistent, katta oʻqituvchisi lavozimida faoliyat olib bordi[1]. 1992-yildan boshlab Toshkent davlat texnika universiteti „Umumtexnika fakulteti“ dekani va Toshkent davlat texnika universiteti prorektori lavozimida faoliyat olib boradi. 1992—1995-yillarda Urganch davlat universiteti injener-texnika fakultetida dekan, prorektor, „Oziq ovqat mashina va apparatlari“ kafedrasiga mudirlik qilgan[1]. 1995—1998-yillarda Xorazm viloyati hokimligi ijtimoiy masalalar guruhi rahbari, kotibiyat mudiri, 1998—2003-yillarda Xorazm viloyati oʻrta maxsus kasb-hunar taʼlimi boshqarmasi boshligʻi, 2003—2006-yillarda Oliy va oʻrta maxsus taʼlim vazirligi Oʻrta maxsus kasb-hunar taʼlimi rivojlantirish instituti prorektori, kafedra professor vazifasini bajaruvchisi, 2006—2007-yillarda Oliy va oʻrta maxsus taʼlim vazirligi Oliy va oʻrta maxsus taʼlimi rivojlantirish markazi boʻlim boshligʻi, 2007—2011-yillarda Oʻzbekiston Respublikasi Iqtisodiyot vazirligi huzuridagi „Oʻz ogʻir neft-gaz kimyo sanoat loyiha“ instituti direktor oʻrinbosari, 2011—2017-yillarda Toshkent davlat texnika universiteti „Ishlab chiqarish jarayonlarini avtomatlashtirish“ kafedrasida professor, 2017—2019-yillarda respublikadagi Energiya tejash milliy kompaniyasi direktor oʻrinbosari lavozimida ishlab kelgan. 2020-yildan Toshkent irrigatsiya va qishloq xoʻjaligini mexanizatsiyalash muhandislari institutida „Texnologik jarayonlarni avtomatlashtirish va boshqarish“ kafedrasida professor lavozimida ishlab kelmoqda[1].
Ilmiy faoliyati
tahrir1989-yil 27-mayda „Don maxsulotlarini elektrofizik parametrlarini nazorat qilish tizimlarini aniqlik tavsiflarini yaxshilash“ mavzusida nomzodlik dissertatsiyasini yoqlagan. 1995-yil 18-martda Agrosanoat majmuasi mahsulotlarini nazorat qilish usullari va texnik vositalari“ mavzusida doktorlik dissertatsiyasini himoya qilgan[1]. 2005-yildan „Taʼlim texnologiyalari“ jurnalining bosh muharriri. 2003-yilda Xalqaro ekologiya va hayot xavfsizligi akademiyasiga, 2022-yilda Xalqaro agrar taʼlim akademiyasining akademigi etib saylangan. 2019-yilda Xalqaro ekologiya va hayot xavfsizligi akademiyasi tomonidan xizmat koʻrsatgan fan arbobi va „Zvezda uchenogo“ mukofotlari bilan taqdirlangan. 350 ortiq ilmiy maqolalar, 6 darslik, 3 monografiya muallifi[1].