Turkiston muxtoriyatining madhiyasi

Turkiston muxtoriyatining madhiyasi muallifi Abdulhamid Choʻlpondir.

TURKISTON MUXTORIYATINING MADHIYASI

1917-yil 26—29-noyabrda Qo‘qonda bo‘lib o‘tgan Umummusulmonlar qurultoyi Turkiston Muxtoriyati hukumatining tashkil topganini e’lon qilgan. Uzoq tarixiy davrlar mobaynida ijtimoiy tarqoqlik va mustamlakachilik sharoitida yashagan, shu tufayli xonavayron bo‘lgan o‘lkada Muxtoriyat hukumatining barpo etilishi taraqqiyparvar kishilar tomonidan katta quvonch va shodlik bilan kutib olingan. Turkiston xalqlarining taqdiri bilan kuyingan Cho‘lpon birinchi bo‘lib Muxtoriyatni olqishlovchi “Ozod turk bayrami” she’rini yozgan. Muxtoriyatning e’lon qilinishiga bag‘ishlangan namoyishda esa otashin nutq so‘zlab, nutqi orasida badiha yo‘li bilan “Ollohu akbar” she’rini aytgan va bu she’rning har bir satridan keyin namoyish ahli “Ollohu akbar!” so‘zlari bilan shoirga jo‘rlik qilgan.

“Ozod turk bayrami” she’ri varaqa shaklida tarqatilib, Muxtoriyatning madhiyasi sifatida xalq orasida ijro etilgan. Mazkur varaqalardan biri qo‘qonlik taniqli adabiyotshunos Ahmadjon Madaminov tomonidan topilgan va u bu she’rni ilk bor e’lon qilish huquqini kaminaga lutfan bergan. She’r “O‘zbekiston adabiyoti va san’ati” gazetasining 1991-yil 20-sentyabr sonida tegishli izoh bilan e’lon qilingan.

"OZOD TURK BAYRAMI"

Ko‘z oching, boqing har yon!

Qardoshlar, qanday zamon!

Shodlikka to‘ldi jahon!

Fido bu kunlarga jon!

Naqorat:

Turkistonlik — shonimiz, Turonlik — unvonimiz,

Vatan — bizning jonimiz, fido o‘lsun qonimiz!

Bizlar temir jonlimiz!

Shavkatlimiz, shonlimiz!

Nomusli, vijdonlimiz!

Qaynagan turk qonlimiz!

Bo‘ldi kenglik, zo‘rlik yo‘q,

Berildi bizga huquq!

Taraqqiyga yo‘l ochuq!

Jaholatga yo‘l yopuq!

Muxtoriyat olindi,

Ishlar yo‘lga solindi,

Milliy marshlar cholindi,

Dushman o‘rtansun endi!

Shodlik, xursandlik chog‘lar,

Ketsun yurakdan dog‘lar,

Vatan bog‘indan zog‘lar!

Selkullasun bayrog‘lar!

Hurriyat — bayrog‘imiz,

Adolat — o‘rtog‘imiz,

Xursand bo‘lgan chog‘imiz

Mevalansun bog‘imiz!

Turk beshigi — Turkiston!

Yeri oltun, tog‘lari kon!

Bolalari qahramon!

Vatan uchun berur jon.

Naqorat

Turkistonlik — shonimiz, turonlik — unvonimiz,

Vatan — bizning jonimiz, fido o‘lsun qonimiz!

Manbalar

• „Hurriyat“ gazetasi 1917-yil 5-dekabr
• n.ziyouz.com portalidan olindi