Vera Artamonova

Vera Ivanovna Artamonova (1923—1994) – Ulugʻ Vatan urushi qatnashchisi, sovet ayol mergani, umumiy hisobda 89 ta dushman askarlarini yoʻq qilgan.

Biografiyasi

1923-yil 24-avgustda Ryazan viloyati Miloslavskiy tumanidagi Yermolovka qishlogʻida tavallud topgan. Keyin oilasi bilan Leningrad shahriga koʻchib oʻtgan, u yerda otasi konkachi va tramvay haydovchisi boʻlib ishlay boshlagan, Veraning onasi esa uy bekasi boʻlgan.

Vera Artamonovaning ota-onasi nemislar qoʻlida halok boʻlgan va Vera ota onasi uchun qasos nemislardan olishga qasam ichgan. 1942-yil 7-dekabrda Vera Artamonova oʻz ixtiyori bilan Qizil Armiya safiga kirgan. Podolsk shahridagi Markaziy ayollar snayperlik maktabida tahsil olib, u yerni muvaffaqiyatli tamomlagan. 1943-yil 15-iyuldan harakatdagi armiya polkiga borib qoʻshilgan, 3-zarbdor armiyaning 153-armiya zaxira oʻqchi polkida yefreytor boʻlib xizmat qila boshlagan. Keyin 3-zarbdor armiyaning 21-gvardiya Nevel oʻqchi diviziyasi oʻqchi polkining 5-oʻqchi batalyoni mergani darajasiga koʻtarilgan. Velikiye lukidan Berlingacha boʻlgan harbiy yoʻlni bosib oʻtgan mergan ayol hisoblanadi. Urush yillarida u 89 ta dushmanni yoʻq qilgan. Vera Artamonova 3- va 2-darajali Shon-sharaf ordeni (1944-yil 26-yanvarda 30 ta oʻldirilgan dushman uchun mukofotga taqdim etilgan), 2- va 1-darajali Ulugʻ Vatan urushi ordenlari, shuningdek, medallari bilan taqdirlangan kam soni ayollardan hisoblanadi.

1945-yil 13-sentyabrdan leytenant unvonida V. I. Artamonova harbiy xizmatdan ozod etilgan. Leningradda yashagan va ishlagan, jamoat ishlari bilan shugʻullangan, shahar faxriylar kengashi aʼzosi boʻlgan.

1994-yil 29-iyulda Leningradda vafot etgan.