Xronometraj

Xronometraj (xrono... va metraj) — i.ch.da qoʻlda yoki mashinada bajariladigan (takrorlanadigan) muayyan mehnat operatsiyasi uchun sarflangan vaqtni hisoblash. X.dan maqsad — mehnat operatsiyasining davomiyligini oʻrganish, tahlil qilish va hisobga olish. Sekundomer yoki boshqa elektron vaqt oʻlchash asboblari yordamida amalga oshiriladi. X. texnologik operatsiya (mas, soat, mashina yigʻishdagi muayyan bir amal)ni bajarish maromi va samarali usulini tanlash, ish meʼyori va ish vaqtini belgilash, ishning bajarilishini nazorat qilishga imkon beradi. X. maqsadida kompyuterdan ham foydalaniladi.