Beknazar Doʻstmurodov
Beknazar Doʻstmurodov (1957.15.6, Yakkabogʻ tumani) – Oʻzbekiston Respublikasi xalq hofizi (2001). Toshkent davlat teatr va rassomlik sanʼati institutini tugatgan (1980). Muqimiy teatrida aktyor va xonanda. Mumtoz ashula, katta ashula va maqom yoʻllarini Orifxon Hotamov, Fattohxon Mamadaliyev, O.Otaxonov, Abdulhoshim Ismoilovlardan oʻzlashtirgan. Repertuaridan Shashmaqom va Fargʻona-Toshkent maqom yoʻllari („Saraxbori Navo“, „Saraxbori Segoh“, „Chorgoh“, „Ushshoq“ va boshqalar), mumtoz va zamonaviy bastakorlar ashulalari („Firoqingizda“, „Guluzorim“, „Sensiz“, „Vatan yagonadir“ va boshqalar), katta ashulalar („Yovvoyi Chorgoh“, „Diyorim Oʻzbekiston“, „Oʻzbekiston madhi“, „Muborak toʻyga keldik“ va boshqalar) oʻrin olgan. M.Dadaboyeva, M. Hasanova bilan hamnafaslikda O.Hotamov bastalagan „Koʻzing ne balo qaro boʻlibdur“, „Sarvqomat“ kabi ikki ovozli (duet) ashulalarni ijro etgan. Doʻstmurodov keng diapazonli, shirali va baland ovoz sohibi; uning ijrosi barcha pardalarda ravon va tekis. Doʻstmurodov hamnafaslari S.Niyozov va A.Ibrohimovlar bilan Respublika katta ashula ijrochilarining koʻrik-tanlovi laureati (bosh sovrin, Andijon, 2001). Doʻstmurodov ijodiga bagʻishlangan 2 videofilm yaratilgan („Oʻzbektelefilm“ studiyasi, 1994. 2001). Doʻstmurodov AQSH, Angliya, Fransiya, Germaniya, Hindiston, Saudiya Arabistoni kabi mamlakatlarda gastrolda boʻlgan.
Beknazar Doʻstmurodov | |
|---|---|
| Tavalludi |
15-iyun 1957-yil |
| Janrlar | mumtoz musiqa |
| Kasbi | aktyor va xonanda |
| Fuqaroligi |
OʻzSSR,  Oʻzbekiston |
| Taʼlimi | Toshkent davlat teatr va rassomlik sanʼati instituti |
| Mukofotlari | Oʻzbekiston Respublikasi xalq hofizi |
| Ushbu maqolada Oʻzbekiston milliy ensiklopediyasi (2000-2005) maʼlumotlaridan foydalanilgan. |
 |
|
Bu maqolada boshqa til boʻlimlariga ishorat yoʻq. Siz ularni topib va ushbu maqolaga qoʻshib, loyihaga yordam berishingiz mumkin. |