Ipak yoʻli xalqaro turizm universiteti

Ipak yoʻli xalqaro turizm universiteti — Xalqaro turizm sohasida professional kadrlar tayyorlash tizimini tashkil etish hamda ilmiy-tadqiqot ishlari va ijodiy ishlarni olib borish bo‘yicha respublikaning tashabbuslarini amaliy ro‘yobga chiqarish, Shanxay hamkorlik tashkilotiga a’zo davlatlarning tarixiy va madaniy-gumanitar aloqalarini yanada rivojlantirish maqsadida tashkil etilgan oliy ta'lim muassasasi.

"Ipak yoʻli" xalqaro turizm universiteti
Asos solingan	2018-yil
Oʻquv yurti turi	universitet
Tipi	gumanitar
Sohasi	turizm
Rektori	Abdulaziz Oqqulov
Talabalari	125
Fakultetlar	4 ta
Bakalavriat	4 yil
Manzili	17-uy, Samarqand, Universitet ko'chasi, Oʻzbekiston

Tarixi

Oʻzbekiston Respublikasi prezidentining “Ipak yo‘li” turizm xalqaro universitetini tashkil etish to‘g‘risidagi qaroriga muvofiq 2018-yil 28-iyunda tashkil topgan.

Universitet faoliyatining asosiy yo‘nalishlari

1. zamonaviy innovatsion va ilmiy-pedagogik texnologiyalarni, fan va texnikaning eng yangi yutuqlarini qo‘llagan holda, turizm sohasida yuqori malakali professional kadrlarni milliy va xalqaro ta’lim standartlariga muvofiq sifatli tayyorlashni ta’minlash;
2. ta’limning tegishli yo‘nalishlari va mutaxassisliklari bo‘yicha o‘quv-metodik adabiyotlarni yaratish, yosh talabalar va mutaxassislarni jalb qilgan holda fundamental va amaliy ilmiy tadqiqotlar olib borish, turizm sohasida ta’lim tizimiga yetakchi xorijiy ta’lim muassasalari tajribasini joriy qilish;
3. turizm sohasida kadrlar tayyorlash tizimini takomillashtirish va modernizatsiya qilishga qaratilgan yangi ta’lim dasturlarini hamda o‘qitishning innovatsion shakllarini ishlab chiqish va joriy etish;
4. istiqbolli yosh bitiruvchilarni chet el oliy ta’lim muassasalariga va ilmiy-tadqiqot markazlariga magistratura hamda doktoranturada o‘qishga muntazam ravishda yuborish orqali Universitetning ilmiy-pedagogik salohiyatini oshirish, pedagogik texnologiyalar va o‘qitish uslublarini faol takomillashtirish;
5. ta’lim va ilmiy faoliyatning ishlab chiqarish faoliyati bilan uzviy integratsiyalashuvi uchun shart-sharoitlar yaratish;
6. turizm sohasi subyektlari mutaxassislarini qayta tayyorlashni va ularning malakasini oshirishni tashkil etish;
7. turistik faoliyatni va turizm sohasida yo‘lovchilarni tashish faoliyatini amalga oshirish;
8. yetakchi respublika va xorijiy ta’lim muassasalari hamda ilmiy-tadqiqot markazlari bilan hamkorlikni, jumladan, ularning mutaxassis hamda ekspertlarini o‘qitish va ilmiy tadqiqotlar o‘tkazish jarayonlariga jalb qilish orqali rivojlantirish, turizm sohasidagi dolzarb masalalarni muhokama qilish bo‘yicha xalqaro ilmiy-amaliy konferensiyalar, seminarlar va simpoziumlar tashkil etish.

Maqomi

1. Universitet oliy ta’lim muassasasi – yuridik shaxs shaklidagi O‘zbekiston Respublikasi rezidenti hisoblanadi, alohida mol-mulkka, mustaqil balansga ega, o‘z majburiyatlari bo‘yicha tasarrufidagi pul mablag‘lari va mol-mulk bilan javob beradi;
2. Universitetda o‘quv-metodik rahbarlik va ta’lim jarayonini yuritish ilg‘or innovatsion hamda ilmiy-pedagogik texnologiyalardan foydalangan holda O‘zbekiston Respublikasi Turizmni rivojlantirish davlat qo‘mitasi tomonidan ta’minlanadi;
3. Universitet O‘zbekiston Respublikasi Turizmni rivojlantirish davlat qo‘mitasining tashkiliy tuzilmasiga kiradi;
4. O‘zbekiston Respublikasi Turizmni rivojlantirish davlat qo‘mitasi raisi ayni vaqtda Universitetning bosh menejeri hisoblanadi;
5. Universitet rektori Universitet professor-o‘qituvchilarining tarkibi to‘liq shakllantirilgunga qadar Universitetning Vasiylik kengashi tomonidan saylanadi, keyinchalik esa Universitet ustavida belgilanadigan tartibda professor-o‘qituvchilar tarkibi tomonidan yopiq ovoz berish orqali saylanadi;
6. Universitetda 2019/2020 o‘quv yilidan boshlab xalqaro turizm sohasida kadrlar tayyorlash bo‘yicha o‘qitishning kredit tizimi qo‘llaniladi;
7. Universitetda o‘qish o‘zbek, rus va ingliz tillarida olib boriladi, bakalavriatda O‘zbekiston Respublikasi davlat ta’lim standartlari talablarini hisobga olgan holda ikkita chet tili: birinchisi – ingliz (fransuz, nemis) tili, ikkinchisi – Shanxay hamkorlik tashkilotining rasmiy tillaridan (rus, xitoy) biri o‘qitiladi;
8. Universitet bitiruvchilariga O‘zbekiston Respublikasida oliy ta’lim to‘g‘risidagi hujjat deb e’tirof etiladigan, belgilangan namunadagi diplom beriladi.

Qabul

1. Universitet bakalavriatiga qabul qilish kvotasi ta’lim yo‘nalishlari yuzasidan, qonun hujjatlariga muvofiq oshirilgan kontrakt stavkalari bo‘yicha qo‘shimcha qabul qilish imkoniyati bilan, 125 kishi, jumladan, davlat grantlariga ko‘ra 42 kishi etib belgilangan.
2. Universitetga abituriyentlarni qabul qilish O‘zbekiston Respublikasi ta’lim muassasalariga o‘qishga qabul qilish bo‘yicha Davlat komissiyasi tomonidan belgilanadigan tartibda amalga oshiriladi.
3. abituriyentlarni, chet el fuqarolari bundan mustasno, Universitet bakalavriatiga qabul qilish test sinovlarini o‘tkazish orqali amalga oshiriladi.
4. chet el fuqarolari Universitet bakalavriatiga belgilangan qabul kvotasidan tashqari suhbat o‘tkazish orqali to‘lov-kontrakt asosida qabul qilinadi.
5. Universitetga talabalarni bakalavriat ta’lim yo‘nalishlari va magistratura mutaxassisliklari bo‘yicha qabul qilish kvotalari soni turizm sohasida mehnat resurslariga bo‘lgan talab prognozidan va Shanxay hamkorlik tashkilotiga a’zo davlatlarning maqsadli buyurtmalaridan kelib chiqqan holda, Universitetning Vasiylik kengashi tomonidan belgilanadi.
6. ilg‘or, e’tirof etilgan xalqaro imtihon tizimlari (TOEFL, IELTS, CEFR, SAT General, SAT Subject va boshqalar) sertifikatlariga ega bo‘lgan abituriyentlarga tegishli fanlardan belgilangan tartibda eng yuqori ball beriladi va kelgusida ular ushbu fanlar bo‘yicha test sinovlaridan ozod qilinadi.
7. Samarqand iqtisodiyot va servis institutining “Mehmonxona xo‘jaligini tashkil qilish va boshqarish” hamda “Turizm (faoliyat yo‘nalishlari yuzasidan)” ta’lim yo‘nalishlari bo‘yicha bakalavriat va magistraturaga qabul tugatiladi.

Fakultet

• Turizm menjmenti

Kafedralar

• Umumkasbiy va ixtisoslik fanlari
• Xorijiy tillar
• Ijtimoiy va tabiiy fanlar

Ta'lim yo'nalishlari

• Kasb ta’limi (turizm)
• Turizm sohasida marketing
• Turizm (faoliyat yo‘nalishlari bo‘yicha)
• Turizm sohasida loyihalash
• Turizm sohasida xizmatlar texnologiyasi va ularni tashkil etish
• Turizm faoliyatida logistika
• Mehmonxona biznesi
• Restoran biznesi
• Ommaviy tadbirlar menejmenti