Ismoilxoja madrasasi

Ismoilxoja madrasasi — Buxoro madrasasi. Madrasa hozirgi kunda saqlanib qolmagan. Ismoilxoja madrasasi 1822—1823-yillarda Muhammadyor otaliq guzarida, Buxoro amirligida hukmronlik qilgan Amir Haydar davrida, Muhammad Sobirxoja valadi sayyid Muhammadxoja tomonidan bunyod etilgan. Madrasa ikki qavatli boʻlib, gumbazli, tashqi va ichki sahnli va masjidi ham mavjud. Ismoilxoja madrasasi gʻarbida Urganjisaroy nomi bilan mashhur karvonsaroy va Muhammadyor otaliq xonaqohi, janubi va sharqida madrasa bunyodkoriga tegishli mulklar mavjud boʻlgan. Voqif madrasa uchun Anjurjoʻy Xoja Yakshanba mavzesida 78,5 tanob hurri xolis yerini, Buxoro shahri hududidagi Kabutarxona mavzesida 100 tanob yerni, mulla Shoh guzaridagi 3 ta attorlik va ikkita noʻxatfuroʻshlik bor timni madrasa uchun vaqf qilgan. Madrasaga voqifning oʻzi mutavvali boʻlgan. Madrasa oldidagi masjidga madrasa voqifining otasi Muhammad Sobirxoja tayinlangan. Undan keyin uning avlodlari ushbu ishni davom ettirishlari lozim boʻlgan. Ismoilxoja madrasasi sharqida oʻnta hujra voqif avlodlariga ajratilgan. Madrasada banoras toʻnli mudarris taʼlim bergan. Madrasa bilan bogʻliq yana hujjatlarda mudarrislar toʻgʻrisida maʼlumotlar ham mavjud. Mulla Abdurauf Ismoilxoja madrasasida mudarrislik qilgan boʻlib, maoshi 100 tillani tashkil etgan. XX asr boshlarida madrasada mulla Abdukarimbek talabalarga dars oʻtgan. Sadri Ziyo ushbu madrasada 33 ta hujralar boʻlganligini yozib qoldirgan. Ismoilxoja madrasasi 32 ta hujradan iborat boʻlgan. Ushbu madrasa Oʻrta Osiyo meʼmorchiligi uslubida bunyod etilgan. Madrasa pishiq gʻisht, yogʻoch, tosh va ganchdan qurilgan.

Madrasa
Ismoilxoja madrasasi
Mamlakat	Oʻzbekiston
Hudud	Buxoro viloyati
Shahar	Buxoro
Maktab yoʻnalishi	sunniy
Mulkdor	Muhammad Sobirxoja valadi sayyid Muhammadxoja
Meʼmoriy uslub	Markaziy Osiyo meʼmorchiligi
Binokorlik tashabbuschisi	Muhammad Sobirxoja valadi sayyid Muhammadxoja
Asosiy sana: 1822—1823-yillar
Holati	Saqlanib qolmagan
Hujralar soni	32 ta
Qurilish materiali	Pishiq gʻisht