Toʻra Narziyev

Toʻra Ikromovich Narziyev (1954-yil 10-yanvar – Jondor tumani, Buxoro viloyati, Oʻzbekiston Sovet Sotsialistik Respublikasi) – sobiq irrigator, Oʻzbekiston Qahramoni (2009), hozirda nafaqada.

Toʻra Narziyev
Tavalludi	10-yanvar 1954-yil (1954-01-10) Jondor tumani, Buxoro viloyati
Fuqaroligi	Oʻzbekiston
Kasbi	fermer
Unvoni

Hayoti va mehnat faoliyati

1954-yil 10-yanvar – Oʻzbekiston Sovet Sotsialistik Respublikasi Buxoro viloyati Jondor tumanining Qorovul qishlogʻi (hozirgi Oʻzbekiston Respublikasi Buxoro viloyati Jondor tumani) da tavallud topgan.

1971—1972-yillarda ekskavator mashinistlarini tayyorlash boʻyicha kurslarini tugatgan. Keyingi faoliyatida akasi Kamol Narziyevdan ekskavatorchilik koʻnikmalarni oʻrgangan. 1974-yilda Buxoro viloyatidagi „Amu-Buxorokanalqurilish“ aksiyadorlik jamiyatiga ekskavatorchi sifatida ishga kirgan. Buxoro viloyatidagi irrigatsiya va melioratsiya suv inshootlarini qurish va tamirlashda koʻp yillik mehnat faoliyatini olib borgan. 2014-yili nafaqaga chiqqan.

2002-yili „Oʻzbekiston Respublikasida xizmat koʻrsatgan irrigator“, 2009-yilda esa „Oʻzbekiston Qahramoni“ unvonlari bilan mukofotlangan. Toʻra Narziyev ushbu mukofot bilan taqdirlanganini eshitgan voqeani:

„Qumsulton“ zovurida ishlardim. Qum barxanlari va siyrak butalardan iborat choʻl. Shamol koʻz ochirmaydi. Quyosh atrofda olov sepgandek, ekskava­tor tinimsiz ishlab turibdi. Shu payt mashinist yordamchisi chaqirib, uyali telefonini uzatib, „Oʻgʻlingiz Nurali bilan gaplashing, aytayaptiki, siz Qahramon boʻlibsiz“ dedi

deb eslaydi.

2014—2019-yillarda Xalq deputatlari Buxoro viloyati kengashi deputati sifatida ish olib borgan.

Oilasi

Oilali. Turmush oʻrtogʻi – Xosiyat Narziyeva. Ikki oʻgʻil, toʻrt qizning otasi.

Mukofotlari

1. 2002-yil – „Oʻzbekiston Respublikasida xizmat koʻrsatgan irrigator“,

2. 2009-yil – Vatan mustaqilligini mustahkamlash, jahon miqyosidagi shon-shuhratini yuksaltirish, islohotlarni yanada chuqurlashtirish borasida davlat va xalq oldidagi ulkan xizmatlari, ishlab chiqarish sohasidagi uzoq yillik qahramonona mehnati hamda yosh avlodni vatanparvarlik va xalqparvarlik ruhida tarbiyalashga qoʻshgan katta hissasi uchun – „Oʻzbekiston Qahramoni“ unvoni.

Yana qarang

• Oʻzbekiston Qahramonlarining roʻyxati

Adabiyotlar

• Muhammad Ali, Rahmon Qoʻchqor va boshqalar. Oʻzbekiston qahramonlari. Toshkent: Adabiyot, 2021 — 216-bet. Qaraldi: 11-avgust 2023-yil.