Yashpal

Yashpal (12-mart, 1903, Firoʻzpur — 25-dekabr, 1976, Laknav) — hind yozuvchisi. Hindiy tilida ijod qilgan. Milliy ozodlik harakatida qatnashganligi uchun bir necha bor qamalgan (1932— 38).

Yashpal
Tavalludi	3-dekabr 1903-yil Firozpur, Sharqiy Panjob, Hindiston
Vafoti	26-dekabr 1976-yil(1976-12-26) (73 yoshda) Laknau, Laknau, Hindiston
Kasbi	yozuvchi
Ijod qilgan tillari	Hind tili
Fuqaroligi	Hindiston, Britaniya Hindistoni va Hindiston ittifoqi
Mukofotlari	J. Neru mukofoti

Ijodi

Dastlabki hikoyasi — „Qafasdan qutulish“ (1939, qamoqda yozilgan). Yashpal hikoyalarida mamlakatdagi ijtimoiy nuqsonlar fosh qilingan. Yashpal „Xoin“ (1943), „Bir partiyadagi oʻrtoq“ (1946), „Insoniy qiyofa“ (1949), „Amita“ (1956), „Soxta haqiqat“ (195860), „Oʻn ikki soat“ (1963) kabi qissa va romanlarida hind xalqining mustaqillik yoʻlidagi kurash va yutuqlarini tasvirlagan. Yashpalning dastlabki romani „Xoin“da Ikkinchi jahon urushining boshlaridagi, fashistlar va mustamlakachilarga qarshi kurash kuchayib borayotgan davrdagi Hindiston aks etgan. Uning bosh qahramoni, harbiy gospital vrachi Khanna taqdir taqozosi bilan Samarqandga keladi, sanatoriyda ishlaydi, oʻzbek qizi bilan samimiy doʻstlashadi.

Yashpal pyesa, tanqidiy va publitsistik maqolalar ham yozgan. A.Muxtor, B. Kerboboyev va boshqalarning asarlarini hindiy tiliga tarjima qilgan. Panjob shtati adabiy mukofoti (1956) hamda J. Neru mukofoti laureati (1969). Asarlari koʻplab tillarda, jumladan, oʻzbek tilida nashr etilgan.

Manbalar

• Kul bosgan choʻgʻlar, T., 1970.

Adabiyot

• Chauxan Sh., Ocherk istorii literaturi xindi, M., 1960;
• Chelishev Y., Sovremennaya indiyskaya literatura, M., 1981.