Ahmad Aʼzam

Ahmad Aʼzam – taniqli yozuvchi, adabiy tanqidchi, ssenarist va telejurnalist. 1949-yil Samarqand viloyatining Jomboy tumanidagi Gʻazira qishlogʻida tug‘ilgan. 1971-yilda Samarqand davlat universitetining Oʻzbek va tojik filologiyasi fakultetini tamomlab, Alisher Navoiy nomidagi muzeyda ish faoliyatini boshlagan. Keyinchalik, “Guliston” jurnali, “O‘zbekiston adabiyoti va san’ati” gazetasi, “Sovet O‘zbekistoni san’ati” jurnali redaksiya boʻlimida, shuningdek, Oʻzbekiston Yozuvchilar uyushmasida faoliyat yuritgan. Keyinchalik siyosiy hayotga ham qo‘shilgan boʻlib, “Birlik” xalq harakati hamraisi va “Erk” demokratik partiyasining bosh kotibi bo‘lgan. 1999-2004-yillarda Oliy Majlis deputati sifatida faoliyat ko‘rsatgan.

Ahmad Aʼzam
Tavalludi	28-iyun 1949-yil Samarqand viloyati, Oʻzbekiston SSR, SSSR
Vafoti	4-yanvar 2014-yil(2014-01-04) (64 yoshda) Toshkent, Oʻzbekiston
Fuqaroligi	SSSR → Oʻzbekiston
Yoʻnalish	yozuvchi, munaqqid, ssenarist, telejurnalist
Veb-sayti
http://ahmadazam.uz/

1995-yildan boshlab Oʻzbekiston televideniesida bosh muharrir, “Oʻzbekiston” telekanali bosh direktori va Oʻzbektelefilm studiyasining rahbari lavozimlarida ishlagan. O‘zbekiston televideniesida bir qancha ko‘rsatuvlar va hujjatli filmlarni yaratgan, ulardan eng mashhurlari: “O‘zlik”, “Xalqning ko‘ngli” va “To‘rtinchi hokimiyat”.

Adabiy merosiga nasriy asarlar, jumladan, “Oyning gardishi”, “Bu kunning davomi”, “Asqartog‘ tomonlarda”, “Soyasini yo‘qotgan odam” va “Hali hayot bor” kabi romanlar kiradi. Bundan tashqari, “Mas’ul so‘z” nomli adabiy-tanqidiy maqolalar to‘plami hamda “O‘zi uylanmagan sovchi”, “Ro‘yo yoxud G‘ulistonga safar” romanlari ham chop etilgan. Ahmad A’zam 2014-yilning 4-yanvar kuni Toshkent shahrida vafot etgan.

Adabiyotlar

• „Oyning gardishi“
• „Bu kunning davomi“
• Asqartogʻ tomonlarda
• „Soyasini yoʻqotgan odam“
• „Oʻzi uylanmagan sovchi“
• „Oʻzim bilan oʻzim“
• Roʻyo yoxud Gʻulistonga safar
• „Mas’ul soʻz“
• „Til nomusi“