Aleksandra Shlyaxova

Aleksandra Nikolayevna Shlyaxova (1923-yil, Zaporoje, Ukraina SSR, SSSR – 1944-yil, Latviya SSR, SSSR) – Ulug‘ Vatan urushi qatnashchisi, mergan ayol.

Biografiyasi

U 1923- yoki 1924-yilda Zaporojye shahrida tugʻilgan. Urushgacha Zaporoje zavodida ishlagan. Urush boshlanishi va nemis qoʻshinlari hujumi tufayli onasi, singlisi va ukasi bilan birga Uralga koʻchirilgan.

Cheborkul tumani harbiy komissarligi tomonidan Qizil Armiya safiga chaqirilgan. 1942-yil dekabr oyida ayollar snayper maktabini aʼlo baholarga tugatib, bitirish marosimida VLKSM Markaziy Qoʻmitasi nomidan qurol qoʻndogʻida monogrammasi boʻlgan maxsus snayper miltigʻi bilan taqdirlangan. 1943-yil avgust oyidan boshlab harakatdagi armiyada xizmat qilgan. 21-gvardiya oʻqchi diviziyasi tarkibida jang qilgan.

1943-yil 1-dekabrda mina parchasi bilan yaralangan. Shifoxonada davolanishdan soʻng oʻz qismiga qaytgan. 1943-yil 5-dekabrdagi diviziya buyrugʻi bilan 59-Gvardiya oʻqchi polkining 8-oʻqchi rotasi snayper gvardiya serjanti A. N. Shlyaxova Qizil Yulduz ordeni bilan taqdirlangan. 1944-yil yanvar oyida 55 nafar dushman askar va zobitlarini yoʻq qilgani uchun „Jasorati uchun“ medali bilan taqdirlanishga tavsiya etilgan. Oʻsha yilning 31-yanvarida Qizil Bayroq ordeni bilan mukofotlangan. Starshina unvonigacha koʻtarilgan va snayperlar vzvodining komandiri boʻlgan.

1944-yil 7-oktabrda Latviya SSR hududida halok boʻlgan. Dobele shahrida dafn etilgan. Vafotidan soʻng 1-darajali Vatan urushi ordeni bilan taqdirlangan. Uning snayper miltigʻi Moskvadagi Qurolli Kuchlar Markaziy muzeyida saqlanmoqda.

Zaporoje shahrida maktablardan birining pioner otryadi uzoq yillar davomida Aleksandra Shlyaxova nomi bilan atalgan

Adabiyotlar

V. A. Chuvilkin. „Devushki v shinelyax“. „Moskva ishchisi“ nashriyoti, 1982-yil.