Atrofiya (yunoncha atropheo – ozayapman) – Toʻqimalar oziqlanishining buzilishi natijasida aʼzolarning kichrayib, hujayralar sifatining oʻzgarishi. Fiziologik va patologik Atrofiya tafovut qilinadi. Fiziologik Atrofiya aʼzolarfunk-siyalarining toʻxtashi natijasida roʻy beradi. Chunonchi organizm oʻsishdan toʻxtaganda, ayrisimon bez atrofiyalanib, yogʻ toʻqimasi koʻpayadi. Odam qarigan sari aʼzolar faoliyati susayishi natijasida bezlar va ichki aʼzolar hajmi kichrayadi, teri elastikligi yoʻqolib, ajin paydo boʻladi. Patologik Atrofiyaga turli kasalliklar (sil, oʻsmalar, zaharlanish va boshqalar) sabab boʻladi. Bunda aʼzolar hajmi kichrayadi. Atrofiya sabablari yoʻqotilsa, aʼzolar asli holiga qaytishi mumkin, jumladan singan suyak bitgandan soʻng atrofiyalangan muskullar tiklanib, harakat normallashadi. Atrofiyaning oldi olinmasa, hayot uchun xavf tugʻdirishi mumkin, masalan, koʻz nervi Atrofiyasi koʻrlikka, muskullar Atrofiyasi falajlikka, jinsiy bezlar Atrofiyasi jinsiy qobiliyatning susayishi (farzand koʻrmaslikka) sabab boʻladi[1].

Manbalar tahrir

  1. OʻzME. Birinchi jild. Toshkent 2000-yil