Epidemik parotit

Epidemik parotit – oʻtkir yuqumli virusli kasallik. Soʻlak bezlari (ayniqsa, quloq oldi bezi)ning yalligʻlanishi bilan kechadi kasallik hisoblanadi. Filtrlanuvchi viruslar qoʻzgʻatadi. Havo yoʻli orqali, bemor foydalangan turli idishlardan yuqadi. Epidemik parotit hamma yoshdagi kishilarda, (1-1,5 yoshda 95% holat) koʻproq 5—15 yoshdagi bolalarda uchraydi. Inkubatsion davri 18—20 kun. Epidemik parotit da bosh ogʻriydi, gavda temperaturasi koʻtariladi. Ogʻirroq hollarda bemor burnidan qon keladi, qusadi, tirishadi. Kasallikning 2—3 kuni quloq oldi bezi shishib, u quloqning bir tomoniga, 1—2 kundan keyin esa ikki quloq atrofiga oʻtadi. Ogʻiz ochilganda, ovqat chaynalganda ogʻriq seziladi. Kasallik 8—10 kun davom etadi. Kasallik yumshoq miya pardasining yalligʻlanishi koʻrinishida ham oʻtishi mumkin. Bu shaklida bolalar qusadi, boshi qattiq ogʻriydi va meningit belgilari paydo boʻladi. Nevrit, otit kabi asoratlar qoladi.

Davosi: issiq kompress qilinadi. UVCH buyuriladi. Suyuq ovqatlar, vitaminlar beriladi. Ogʻiz borat kislota eritmasi bilan chayiladi.