Erkin Ummatov

Ummatov Erkin Rahmanovich (1963-yil, Jizzax viloyati, Jizzax tumani) — Oʻzbekiston temir yoʻllari AJ yoʻl xoʻjaligi boshqarmasi boshligʻi, Oʻzbekiston qahramoni.

Erkin Ummatov
Tavalludi	15-mart 1963-yil (1963-03-15) Jizzax viloyati, Jizzax tumani
Fuqaroligi	Oʻzbekiston
Taʼlimi	Toshkent temir yoʻl muhandislari instituti
Dini	Islom
Mukofotlari

Tarjimai holi

Ummatov Erkin Rahmanovich 1963-yil 15-martda Jizzax viloyatining Jizzax tumanida tugʻilgan. 1966-yilda Toshkent temir yoʻl muhandislari institutini tamomlab, temiryoʻllar qurilishi, yoʻl va yoʻl xoʻjaligi quruvchi-muhandisi mutaxassisligini egallagan. Erkin Ummatov mehnat faoliyatini 1980-yilda Oʻrta Osiyo temir yoʻli Toshkent boʻlimining Jizzax temiryoʻl boʻlinmasi montyori sifatida boshlagan. Institutni tamomlaganidan soʻng Oʻrta Osiyo temir yoʻli Buxoro boʻlimi Samarqand temir yoʻl boʻlinmasida turli lavozimlarda faoliyat olib borgan. „Oʻzbekiston temir yoʻllari“ DАK yoʻl xoʻjaligi boshqarmasida masʼul lavozimlarda faoliyat olib borgan. Jumladan, „Oʻztemiryoʻlqurilishmontaj“ unitar korxonasining maxsus mexanizatsiyalashgan yoʻl stansiyasi boshligʻi va shu korxona bosh direktorining gidrotexnik inshootlar qurilishi boʻyicha oʻrinbosari. Erkin Ummatov 75 kilometrlik „Hayraton – Mozori Sharif“ afgʻon temiryoʻl liniyasini loyihalash va qurish jarayonlarida qurilish boshqarmasi boshligʻining birinchi oʻrinbosari sifatida ishtirok etgan. Shuningdek, „Toshguzar – Boysun – Qumqoʻrgʻon“ liniyasi qurilishida ham qatnashgan. „Angren – Pop“ temiryoʻlida tunnelning ikkita portaliga olib boruvchi yoʻnalishdagi tuproq ishlari va 16.3 million kubometr burgʻulash-portlatish ishlariga rahbarlik qilgan.

Mukofotlari

Oʻzbekiston Respublikasining birinchi prezidenti — Islom Karimovning 2016-yil 23-avgustdagi PF-4823-sonli farmoni bilan Ummatov Erkin Rahmanovichga Oʻzbekiston qahramoni mukofoti berilgan.

Adabiyotlar

Muhammad Ali, Rahmon Qoʻchqor va boshqalar. Oʻzbekiston qahramonlari. Toshkent: Adabiyot, 2021 — 216 bet. 11-avgust 2023-yilda qaraldi.