Jonim
Jonim – pop janrida ijod qilgan sobiq oʻzbek musiqiy guruhi boʻlib, 1999—2001-yillarda faoliyat olib borgan[2]. „Qarama koʻzlarimga“ va „Oʻtib ketadi“ kabi qoʻshiqlari bilan mashhurlikka erishgan. Bastakor Vagif Zokirov tomonidan asos solingan ushbu guruh aʼzolari dastlab Zilola Musayeva hamda Aziza Nasriddinovalardan iborat boʻlgan boʻlsa, Aziza guruhni tark etgach, uning oʻrnini Vagif Zokirovning turmush oʻrtogʻi Natella egallagan[3]. 2001-yilda Zilola yakkaxon ijodini boshlaganidan soʻng esa guruh faoliyati yakunlangan[1].
| Jonim | |
|---|---|
 Jonim guruhi aʼzolari Aziza Nasriddinova (chapda) va Zilola Musayeva (oʻngda). | |
| Umumiy maʼlumot | |
| Mamlakat |
 Oʻzbekiston |
| Faoliyat yillari | 1999—2001, 2010—2011 |
| Janr | Pop |
| Leybl | Tarona records[1] |
| Sobiq aʼzolar |
Zilola Musayeva Aziza Nasriddinova Natella Madina Rashidova Mira Fatullayeva |
Tarixi
tahrirJonim guruhi 1999-yilda Vagif Zokirov taklifi bilan tashkil etilgan. Oʻsha vaqtlarda Aziza Nasriddinova bastakor Vagif Zogirov bilan birga ijod qilar edi. Zilola Musayeva esa bastakorning turmush oʻrtogʻi hisoblangan Natellaning dugonasi boʻlgan. Guruh tuzish taklifini olgan qizlar bu taklifni biroz oʻylab koʻrishgan, shundan soʻng Aziza va Zilola Jonim guruhi nomi ostida birgalikda ijod qila boshlashgan. 1999-yilning iyul oyida guruh Tarona records leybli bilan shartnoma imzolagan. Aziza Nasriddinova YouTubedagi Nozim Tolipov kanaliga bergan intervyusida Tarona records bilan hamkorligi haqida quyidagicha gapirgan edi:
„Tarona records“dan umuman yordam olmaganmiz. U faqatgina kasseta, konsert va radioda qoʻshiqlarimiz berib borilishiga yordam berishgan[4].
Guruh oʻz faoliyatini boshlaganidan ikki oy oʻtib, „Oʻtib ketadi“ nomli ilk albomini taqdim etgan. Albomning asosiy singli hisoblangan „Oʻtib ketadi“ nomli tarona esa haqiqiy xitga aylanib, guruhning tanilishiga yordam bergan. Shuningdek, ular 1999-yilda suratga olingan „Tohir va Zuhra“ filmida ham suratga tushishgan. „Oʻtib ketadi“ singli esa ushbu film uchun saundtrek sifatida ishlatilgan[5]. 2000-yilda ular „Tarona taqdimoti“ konsert dasturida ilk bor sahnaga koʻtarilib, „Oʻtib ketadi“ qoʻshigʻini kuylashgan[6]. Birozdan soʻng esa „Oʻtib ketadi“ taronasi uchun klip suratga olingan. Ularning 2000-yilda taqdim etgan „Qarama koʻzlarimga“ qoʻshigʻi ham katta mashhurlikka erishgan. 2001-yilning yanvar oyida Aziza guruhni tark etgan va uning oʻrnini Natella egallagan. Guruh ushbu tarkibi bilan 9 oy ijod qilgan. Ushbu vaqt davomida ular Vagif Zokirov bilan birgalikda „Qarama koʻzlarimga“ treki uchun klip suratga olishgan. Shuningdek, „Tarona 2001“ mukofotini ham qoʻlga kiritishgan[7]. 2001-yilning oxirida Zilola ham yakkaxon ijodini boshlaganidan soʻng, guruh oʻz faoliyatini yakunlagan[7].
Diskografiyasi
tahrirAlbomi
tahrir| Albom | Maʼlumotlari | Qoʻshiqlari |
|---|---|---|
| Oʻtib ketadi |
|
1. Oʻtib ketadi |
Videografiyasi
tahrir| Yil | Nomi | Rejissyor | Manba. |
|---|---|---|---|
| 1999-yil | Oʻtib Ketadi | [3] | |
| 2000-yil | Yondim | [8] | |
| 2001-yil | Qarama koʻzlarimga | Vagif Zokirov | [3] |
Qayta tashkil etilishi
tahrir
2010-yilda Shahzoda (Zilola Musayeva) sobiq Jonim guruhini qayta tashkil etish maqsadida kasting oʻtkazgan. Ushbu kastingda esa Toshkentlik Madina Rashidova va Samarqandlik Mira Fatullayevalar gʻolib boʻlishgan. Keyin esa Shahzoda prodyuserligida ushbu qizlar Jonim guruhi nomi ostida ijod qila boshlagan[3]. 2010-yilda ular sobiq Jonim guruhi tomonidan kuylangan „Uyalmagin“ qoʻshigʻini yangi talqinda ijro etib, yangi guruh sifatidagi ilk ijod naʼmunasini taqdim etishgan[9]. Keyin esa „Yondim“ va „Qarama koʻzlarimga“ taronalarini ham remeyk qilishgan. Ushbu qoʻshiqlarga Yodgor Nosirov tomonidan videokliplar ham suratga olinib, omma eʼtiboriga havola qilingan. 2011-yilda Mira Fatullayeva guruhni tark etgan. Uning oʻrniga esa boshqa bir ijrochi olingan, ammo, guruhning faoliyati koʻpga bormagan va qayta tashkil etilgan Jonim guruhining faoliyatiga ham yakun yasalgan[10].
Yana qarang
tahrirManbalar
tahrir- ↑ 1,0 1,1 „«Главным для нее были деньги и слава»: певица Азиза рассказала, как Шахзода стала причиной распада группы Jonim“ (Rus tilida). www.repost.uz. Qaraldi: 17-oktabr 2024-yil.
- ↑ „“Uning uchun pul birinchi o‘rinda edi”. Xonanda Aziza “Jonim” guruhining tarqalishiga Shahzoda sababchi ekani hamda uzoq vaqt “zapret”da bo‘lgani haqida“. www.daryo.uz. Qaraldi: 17-oktabr 2024-yil.
- ↑ 3,0 3,1 3,2 3,3 „“Bankda ishladim, qizimni turmushga berdim va endi ijodga qaytdim”. Sobiq “Jonim” guruhi xonandasi Aziza Nasriddinova bilan suhbat“. www.daryo.uz. Qaraldi: 17-oktabr 2024-yil.
- ↑ „Тарона рекордс. Жоним гурухидан Зилола Шахзодага айланиши. Хонанда Азиза“. www.youtube.com. Qaraldi: 18-oktabr 2024-yil.
- ↑ „Jonim guruhi - O‘tib ketadi st. tohir va zuhra ( offical clip )“. www.youtube.com. Qaraldi: 18-oktabr 2024-yil.
- ↑ „Tarona taqdimoti 2000-yil / Тарона такдимоти 2000-йил“. www.videosashka.com. Qaraldi: 18-oktabr 2024-yil.
- ↑ 7,0 7,1 7,2 „"JONIM" guruhi #Jonimguruhi“. www.vk.com. Qaraldi: 18-oktabr 2024-yil.
- ↑ „Jonim guruhi - Yondim (Official music video)“. www.ok.ru. Qaraldi: 18-oktabr 2024-yil.
- ↑ „JONIM GURUHI“. www.parvona.com. Qaraldi: 20-oktabr 2024-yil.
- ↑ „JONIM GURUHI“. www.muz.uz. Qaraldi: 20-oktabr 2024-yil.