Abdullatif Sultonmahmudov

Abdullatif Sultonmahmudov
Abdullatif Sultonmahmudov
Shaxsiy maʼlumotlar
Tavalludi	1930-yil
Vafoti	2018-yil 9-oktabr; Namangan
Dini	Islom
Tanilgan sohasi	imom-xatib

Abdullatif Sultonmahmudov (arabcha: عبد اللطيف خان سلطان محمودوف)

Taʼlim

Abdullatif Sultonmahmudov (Abdullatif maxdum) 1937–1942-yillarda Namangan shahridagi 4-o‘rta maktabda o‘qiydi. 5-sinfni tamomlagach, urush davri qiyinchiliklari sabab bo‘lib, maktabdagi o‘qishni tashlab, ishlashga majbur bo‘ladi. U 1952-yil islomiy ilmlarini egallash maqsadida Buxoro shahridagi Mir Arab madrasasiga o‘qishga kiradi. U yerda besh yil o‘qiydi, keyin Toshkentdagi Baroqxon madrasasida ham to‘rt yil taʼlim oladi. Bu davr mobaynida, ayniqsa, tafsir va fiqhni chuqur o‘rganib, ustozlari eʼtiborini qozonadi. Madrasani tugallaganlik to‘g‘risidagi shahodatnomani qo‘lga kiritgach (1959-yil), Mir Arab madrasasida arab tilidan o‘qituvchi qilib olib qolinadi. Dars berish mobaynida kechki maktabga qatnab, o‘n yillik o‘rta taʼlim shahodatnomasini oladi. 1960–1962-yillarda Suriya Davlat universitetining shariat fakultetida Shayx Muhammad Amin al-Misriy, Shayx Mustafo Ahmad az-Zarqo, Hishom al-Burhoniy kabi Islom olamining ko‘zga ko‘ringan olimlaridan tahsil oladi.

Faoliyati

Suriyadan qaytgach, diniy nazorat huzuridagi kutubxonaga ishga kiradi. 1963-yildan 1968-yilgacha Mir Arab madrasasida mudarris va ilmiy mudir bo‘lib ishlaydi. Hozirjavobligi va bilimdonligi uchun madrasadagi kasbdoshlari hamda shogirdlari uni „Abdullatif afandi“ deb chaqirishgan. U 1968–1972-yillarda madrasa mudiri bo‘lgan. O‘sha davrda o‘qigan talabalar Abdullatif Sultonmahmudovni mudir bo‘la turib, farroshlar vazifasini ham o‘zi bajargan o‘ta kamtarin inson sifatida eslashadi.

Abdullatif Sultonmahmudov 1973-yil Namanganga qaytib, Shayx Eshon jome masjidida (1977–1980-yillar), keyinchalik Maxdum Eshon masjidida imom-xatib bo‘lib ishlaydi. 1991-yil Namanganda Mulla Qirg‘iz o‘rta-maxsus islom bilim yurti ochilgandan keyin, ko‘p yillar ushbu dargohda tafsir ilmidan dars bergan. Abdullatif Sultonmahmudov 1994-yildan umrining oxirigacha Mulla Bozor Oxund jome masjidida imom-xatiblik qilgan^[1].

Abdullatif Sultonmahmudovdan taʼlim olgan yuzlab shogirdlari bugungi kunda yurtimiz hamda xorijiy davlatlarda muftiy, bosh imom, imom-xatib kabi vazifalarda xizmat qilmoqdalar^[2].

Vafoti

Abdullatif Sultonmahmudov 2018-yil 9-oktabrda vafot etgan.

Manbalar

↑ Ислом энциклопедияси (oʻzbekcha,), 2020-yil. ISBN 978-9943-59-267-4.
↑ O‘zbekiston ulamolari. – T.: „Movarounnahr“, 2015. 128–129..

Ushbu maqolada Islom ensiklopediyasi (2020) maʼlumotlaridan foydalanilgan.

Islom shaxsiyati haqidagi ushbu maqola chaladir. Siz uni boyitib, Vikipediyaga yordam berishingiz mumkin.

Bu maqolada boshqa til boʻlimlariga ishorat yoʻq.
Siz ularni topib va ushbu maqolaga qoʻshib, loyihaga yordam berishingiz mumkin.

[1] Ислом энциклопедияси (oʻzbekcha,), 2020-yil. ISBN 978-9943-59-267-4.

[2] O‘zbekiston ulamolari. – T.: „Movarounnahr“, 2015. 128–129..

[1]

[2]