Abdulqayyum Ibrohimov
Abdulqayyum Ibrohimov (arabcha: عبد القیوم إبراهیموف) — (1887 — 1971, Namangan).
Abdulqayyum Ibrohimov | |
---|---|
Shaxsiy maʼlumotlar | |
Tavalludi | 1887-yil |
Vafoti |
1971-yil |
Dini | Islom |
Tanilgan sohasi | mudarris |
Taʼlim tahrir
Abdulqayyum domla nomi bilan tanilgan. Savodini eski maktabda chiqargan, keyin mashhur ulamo Sobitxonto‘ra Abdumaoniydan saboq olgan. Abdulqayyum Ibrohimov undan sarf, nahv, tafsir, fiqh, meros ilmini puxta o‘rganadi. Ayniqsa, Sirojuddin Sajovandiy al-Hanafiyning meros ilmiga oid „Sirājiyya“ kitobini mukammal o‘rganib, O‘zbekiston va qo‘shni respublikalarda bu sohaning bilimdoni bo‘lib taniladi. Bu borada undan Ahmadxon qori Sodiqov (1890-1986-yillar), undan Horunxon Ayyubxonov tahsil olib, ustoz-shogirdlik anʼanasini davom ettirishgan.
Iqtibos tahrir
Ahmadxon qori Abdulqayyum Ibrohimovning „Alloh menga diniy ilmlardan o‘n to‘rttasini mukammal bergan edi. Alhamdulillah, bugun sizga meros ilmini to‘la o‘rgatdim va yettita shogird chiqardim. Oh, qolgani tuproqqa ko‘miladigan bo‘ldi“, — deganini ko‘p yodga olardi.
Asari tahrir
Ahmadxon qorining vafotidan so‘ng viloyatda Horunxon Ayyubxonov uning davomchisi bo‘ldi. Abdulqayyum Ibrohimov qalamiga mansub diniy yo‘l-yo‘riqlar aks ettirilgan „Tuhfat ul-avlod“ asari bor. Qo‘lyozma holidagi bu kitob Ahmadxon Sodiqovning o‘g‘li Musoxon Ahmadjonov qo‘lida saqlanmoqda.
Faoliyati tahrir
Abdulqayyum Ibrohimov 1945-1950-yillarda Maxdum Eshon jome masjidida imom, 1950-yldan boshlab esa, Mir Arab madrasasida mudarris bo‘lib ishlaydi. 1961-yilga tegishli arxiv hujjatlarida ham uning nomi mudarrislar ro‘yxatida qayd etilgan. 1954-yilda diniy nazoratda ishlagani haqida maʼlumotlar bor.
Hunarlari tahrir
Abdulqayyum Ibrohimov el orasida taroq yasash bilan shug‘ullangani uchun „mashshot“, suhbat asnosida latifalarni ko‘p ishlatgani uchun „Afandi hoji“ nomlari bilan ham tanilgan.Yigit kishiga qirq hunar oz, deb bilgan bu inson asalari boqishning ham ustasi bo‘lib, kolxoz asalarisini boqqan.
Vafoti tahrir
Abdulqayyum Ibrohimov uzoq davom etgan xastalikdan so‘ng vafot etgan. Janoza namozini muftiy Ziyouddinxon ibn Eshon Boboxon o‘qigan. Namangandagi Otbozori (hozirgi Mangulik) qabristoniga dafn etilgan[1].
Adabiyotlar tahrir
- O‘zR MDA — 500, v-48;
- O‘zbekiston ulamolari. — T.: „Movarounnahr“, 2015. 152-153.
Manbalar tahrir
- ↑ Ислом энциклопедияси (oʻzbekcha,), 2020-yil. ISBN 978-9943-59-267-4.
Ushbu maqolada Islom ensiklopediyasi (2020) maʼlumotlaridan foydalanilgan. |