Isroil Ismoilov

Isroil Ismoilov (1939-yil 27-oktyabr, Samarqand viloyati, Oʻzbekiston SSR, SSSR – 2016-yil 28-mart, Dushanbe, Tojikiston) – fizik, fizika-matematika fanlari doktori, professor, Tojikistonda xizmat koʻrsatgan fan va texnika arbobi, Tojikistonda xizmat koʻrsatgan madaniyat xodimi.

Isroil Ismoilov
Tavalludi	27-oktyabr, 1939-yil Samarqand viloyati, Oʻzbekiston SSR, SSSR
Vafoti	28-mart, 2016-yil Dushanbe, Tojikiston
Fuqaroligi	SSSR→ Tojikiston

Hayoti

Isroil Ismoilov 1939-yil 27-oktyabr kuni Oʻzbekiston SSRga qarashli boʻlgan Samarqand viloyatida tugʻilgan. U 1962-yil Samarqand davlat universitetining fizika-matematika fakultetini tamomlagan. Shundan soʻng, Novosibirsk shahridagi zavodlardan biriga muhandis sifatida ishga yuborilgan. U yerda 1963-yilgacha ishlagan. 1964-yilda Umarov nomidagi Tojikiston fanlar akademiyasida kichik ilmiy xodim lavozimida faoliyatini boshlagan. Shu yilning oxirida, akademiyaning laboratoriya boʻlimiga rahbarlik qilgan. Isroil Ismoilov 1965-yil SSSR Fanlar akademiyasi qoshidagi Fizika institutining aspirantura taʼlim bosqichiga oʻqishga qabul qilingan. 1968-yilda aspiranturani muvaffaqiyatli tamomlagan. Isroil Ismoilov 2016-yil 28-mart kuni Tojikiston Respublikasiga qarashli boʻlgan Dushanbe shahrida vafot etgan.

Ilmiy faoliyati

Isroil Ismoilov 1968-yilda „Qattiq eritmalar hisobiga ishlaydigan elektr generatorlari“ mavzusida nomzodlik dissertatsiyasini himoya qilgan. U 1969-yilda SSSR Fanlar akademiyasining Fizika instituti qoshida „Kvant elektronikasi“ laboratoriyasini tashkil qilgan. Isroil Ismoilov 170 dan ortiq ilmiy ishlar va maqolalar muallifi hisoblanadi.

Mukofotlari

Isroil Ismoilov „Buyuk xizmatlari uchun“ ordeni bilan mukofotlangan. U 1996-yilda „Tojikistonda xizmat koʻrsatgan fan va texnika arbobi“ unvoni bilan taqdirlangan. Shuningdek, SSSR Fanlar akademiyasining va Tojikiston hukumatining faxriy yorliqlari bilan mukofotlangan.