Mannon Uygʻur koʻchasi (Toshkent)

Mannon Uygʻur koʻchasi — Shayxontohur va Uchtepa tumanlarini birlashtirib turuvchi poytaxtning markaziy koʻchalaridan biri. Toshkent avtomobil halqa yoʻli va Laylitoʻgʻon koʻchasi oraligʻida. Uzunligi 7 km atrofida. 1955-yil Oʻzbekiston xalq artisti Mannon Uygʻur nomi berilgan. Tarkibida tor koʻcha va 4 ta berk koʻcha bor.

Mannon Uygʻur koʻchasi

Umumiy maʻlumotlar
Mamlakat	Oʻzbekiston
Shahar	Toshkent
Tuman	Shayxontohur Uchtepa
Uzunligi	7 km
Kim sharafiga nomlangan	Mannon Uygʻur
Koʻchada joylashgan binolar	1-shahar kasalxonasi shahar perinatal markazi Shayx Zayniddin bobo maqbarasi Abdulla Qahhor nomidagi madaniyat uyi

Yoʻnalishida shaxsiy turar joy binolari, boshbekat, 1-shahar kasalxonasi, shahar perinatal markazi, oilaviy poliklinika, Shayx Zayniddin bobo maqbarasi, masjidi va qabristoni, Abdulla Qahhor nomidagi madaniyat uyi, Qurilish va kommunal xoʻjaligi kasb-hunar kolleji, „Koʻkcha Oqtepa“ bozori, savdo majmualari, „Islomobod“ va „Shofayzibogʻ“ mahalla guzari, yonilgʻi quyish shoxobchalari, dorixonalar, umumiy ovqatlanish, turli servis xizmat koʻrsatish maskanlari joylashgan. Koʻcha boʻylab barcha turdagi jamoat transporti vositalari xarakati yoʻlga qoʻyilgan.

Mustaqillik davrida koʻcha tubdan taʼmirlanib, eniga kengaytirildi, asfalt qoplanib, obodonlashtirish va koʻkalamzorlashtirish ishlari olib borildi. 2003-yil 27-avgustda Mannon Uygʻur koʻchasi va Kichik halqa yoʻli kesishmasida eni 30 metr, uzunligi 75 metr boʻlgan yangi koʻprik foydalanishga topshirildi. A.Xoʻjaev, Oqsoy, Koʻkcha Darvoza, Nazarbek kabi koʻchalar va Kichik halqa yoʻli bilan tutashgan. Yaqinida Eskijoʻva bozori, "Jar" sport-sogʻlomlashtirish majmui, Suzukota maqbarasi joylashgan.

Yana qarang

• Toshkent koʻchalari roʻyxati