Al-Muhojir ibn Abu Umayya

Al-Muhojir ibn Abu Umayya
arabcha: المهاجر بن أبي أمية المغيرة بن عبد الله
Shaxsiy maʼlumotlar
Dini	Islom
Ota-onasi	Abu Umayya ibn al-Mugʻiyra (otasi) Atika bint Amir (onasi)

Al-Muhojir ibn Abu Umayya ibn al-Mugʻiyra ibn Abdulloh (arabcha: المهاجر بن أبي أمية المغيرة بن عبد الله) – Quraysh qabilasining Banu Maxzum urugʻidan boʻlgan sahoba, Ridda urushlari (632–633) davrida Yamandagi faol musulmon qoʻmondoni.

Al-Muhojir ibn Abu Umayya ibn al Mugʻiyra ibn Abdullohning tugʻilgandagi ismi Valid boʻlgan, keyinchalik Islom paygʻambari Muhammad uni al-Muhojir deb oʻzgartirgan.

Oilasi

Al-Muhojirning otasi Abu Umayya ibn al-Mugʻiyra Makkada Banu Maxzum urugʻining islomdan oldingi yetakchisi Al-Mugʻiyra ibn Abdullohning oʻgʻli boʻlgan. Abu Umayya sayohatchilarga saxiyligi bilan mashhur edi va xalq orasida Zad ar-Rakb (yoʻlovchilarni taʼminlovchi) nomi bilan mashhur boʻlgan. Al-Muhojirning onasi Atika bint Amir Kinana qabilasining Firas urugʻidan boʻlib, oʻzining jangovar mahorati bilan mashhur boʻlgan. Singlisi Ummu Salama Muhammadning xotini edi. Al-Muhojir Xolid ibn Validning ota tomondan birinchi amakivachchasi boʻlgan.

Hayoti

Muhammad paygʻambar al-Muhojirni Yamanning Kinda (asosan, uning Banu Muoviya boʻlimi) va Sadif qabilalariga soliq yigʻuvchi qilib tayinlagan. Al-Muhojir kindiy zodagon ayol, Muhammadning sobiq xotini Asmo bint an-Nu’mon ibn Abu al-Javnga uylangan, keyinchalik esa Asmo al-Muhojirning qarindoshi Ikrima ibn Abu Jahlga turmushga chiqqan. 631-yilda Muhammad al-Muhojirni Yamanning asosiy shahri Sanoga hokim etib tayinlaydi, biroq u ushbu lavozimni qabul qilmaydi va 632-yilda xalifa Abu Bakr Siddiq taxtga kelguniga qadar Madinada qoladi.

Abu Bakr al-Muhojirni Yaman hokimi Ziyod ibn Labid al-Ansoriyni qoʻllab-quvvatlash va Ridda urushlari paytida Hazramavtdagi (Janubiy Arabiston qirgʻoq mintaqasi) Kinda qabilasi Banu Muoviya qoʻzgʻolonini bostirish uchun yuboradi. Kinda qabiasi oxir-oqibat al-Muhojir va Ikrimaga taslim boʻladi.