Abul Abbos Saffoh, Abdulloh ibn Muhammad ibn Ali ibn Abdulloh ibn Abbos ibn Abdulmuttalib (722-754). Abbosiylar sulolasining birinchi hukmdori (750-754). Hozirgi Iordaniya hududidagi Hamimada tugʻilgan. Umaviylar agʻdarilgach 750-yil Kufada taxtga oʻtirgan. Abul Abbos hokimiyatga kelgach oʻzini haqiqiy hukmdor sifatida koʻrsata olmadi. Avval Andalusiya, keyin Shimoliy Afrikaning gʻarbiy qismi qoʻldan ketdi. U taxtga chiqishda yordam bergan Abu Muslimni Xuroson voliysi etib tayinladi. Abul Abbos tomonidan Ali avlodlariga qarshi harakat boshlandi. Abul Abbos shialardan xavfsirab poytaxtni Kufadan Anbarga koʻchirdi. Bu yerda bir qancha qasrlar qurdirib, 754-yilda shu yerda vafot etdi.