Oʻzbekiston futbol assotsiatsiyasi

Oʻzbekiston Futbol Assotsiatsiyasi
Turi	futbol tashkiloti
Maqomi	federatsiya
Maqsadi	Oʻzbekiston futbolini rivojlantirish
Ishga tushgan sanasi	8-noyabr, 1991-yil (32 yil avval)
Joylashuvi	Toshkent, 100011, Islom Karimov koʻchasi, 98-a
Hududiy xizmati	Oʻzbekiston
Prezident	Abdusalom Azizov
Birinchi vitse-prezident	Ravshan Ermatov
Vitse-prezident	Odil Ahmedov
Bosh mahkamasi	Assotsiatsiya
Aʼzolari	Osiyo Futbol Konfederatsiyasi
Vebsayti	ufa.uz
Til(lar)i	Oʻzbek, Rus
Hamkor tashkilotlari	Oʻzbekiston Milliy Olimpiya qoʻmitasi; Oʻzbekiston Respublikasi Yoshlar siyosati va sport vazirligi; Oʻzbekiston Professional futbol ligasi

Oʻzbekiston futbol assotsiatsiyasi, 1991—2018-yillarda Oʻzbekiston futbol federatsiyasi, 1946—1991-yillarda Oʻzbekiston Sovet Sotsialistik Respublikasi futbol federatsiyasi, qisqartmasi OʻFA — Oʻzbekistonning futbol klublari va musobaqalarini idora etuvchi tashkilot. U mamlakat futbol terma jamoalarini tashkil etish va boshqarish, Oʻzbekistonda futbolni qoʻllab-quvvatlash, rivojlantirish va ommalashtirish bilan shugʻullanadi^➤.

Oʻzbekiston futbol assotsiatsiyasining Toshkent shahri, Qoraqalpogʻiston Respublikasi va har bir viloyatda 14 ta boʻlimi mavjud. Boʻlimlarga ushbu hudud rahbari (hokim) ayni vaqtda raislik qiladi.

Tarixi

Oʻzbekiston futbol assotsiatsiyasi 1946-yilda SSSR futbol federatsiyasining boʻlimi, Oʻzbekiston SSR futbol federatsiyasi sifatida tashkil etilgan. Oʻzbekiston mustaqillikka erishgach, 1992-yilda Oʻzbekiston futbol federatsiyasiga aylantirildi. 1994-yilda FIFA va OFKga qabul qilindi. UEFAga aʼzo boʻlish imkoniyatiga ega boʻldi, ammo bu taklif nomaʼlum sabablarga koʻra rad etildi.

Oʻzbekiston Futbol Federatsiyasi FIFA va OFKga 1994-yilda qabul qilingan boʻlsa-da, Oʻzbekiston milliy terma jamoasiga 1992-yildan beri FIFA shafeligida oʻtkazilayotgan xalqaro oʻrtoqlik oʻyinlariga ruxsat berilgan. 1997—2013-yillarda Oʻzbekiston Futbol Federatsiyasi OFKning quyi federatsiyalaridan biri — oʻsha paytda Markaziy va Janubiy Osiyo (hozirgi) mamlakatlari futbol federatsiyasini birlashtirgan Markaziy va Janubiy Osiyo futbol federatsiyasi tarkibiga kirgan. Bu subfederatsiya Janubiy Osiyo futbol federatsiyasi deb ataladi va faqat Janubiy Osiyo davlatlarini birlashtiradi. 2014-yilning iyun oyidan Oʻzbekiston futbol assotsiatsiyasi OFKning yangi subfederatsiyasi — Afgʻoniston, Eron, Qirgʻiziston, Tojikiston, Turkmaniston va Oʻzbekiston futbol federatsiyalarini birlashtirgan Markaziy Osiyo futbol federatsiyasi tarkibiga kirdi.

2008-yilgacha Oʻzbekiston futbol federatsiyasi Oʻzbekistondagi barcha futbol, jumladan, milliy terma jamoalar va Oʻzbekiston chempionatlarini nazorat qilib kelgan. Ammo 2008-yilda Oʻzbekistonda yana bir futbol tashkiloti — Oʻzbekiston Professional futbol ligasi (OʻzPFL) tashkil etilib, Oʻzbekiston chempionatlarini nazorat qila boshladi. Oʻzbekiston futbol federatsiyasi faqat Oʻzbekiston terma jamoalari va ayollar oʻrtasidagi musobaqalar ustidan nazoratni oʻzida saqlab qoldi.

Vazifalari

Oʻzbekiston milliy futbol terma jamoasi, futzal milliy terma jamoasi, Olimpiya terma jamoasi, yoshlar terma jamoalari (U-23 va U-20), oʻsmirlar terma jamoasi (U-17), amputantlar oʻrtasidagi terma jamoasi, ayollar terma jamoasi va oʻsmir ayollar milliy terma jamoasi faoliyatini muvofiqlashtiradi, musobaqalar oʻtkazilishini nazorat qiladi.

Prezidentlar

Oʻzbekiston futbol assotsiatsiyasi rahbari prezident hisoblanadi. Boshqa sport federatsiyalaridagidek, 1992-yildan buyon futbol federatsiyasida ham Oʻzbekiston siyosiy elitasida muhim oʻrin egallagan shaxslar prezidentlikka saylanib keladi. 1992—1995-yillarda Oʻzbekiston bosh vaziri lavozimida ishlagan Abdulhoshim Mutalov bir vaqtda futbol assotsiatsiyasi rahbari boʻlgan. Keyingi 10 yil davomida 1991-yildan buyon ichki ishlar vaziri lavozimida ishlagan Zokir Almatov rahbar boʻlgan. 2005-yilda salomatligi yomonlashgani sabab bu lavozimni tark etgan. Uning oʻrniga senator Mirabror Usmonov saylandi. 2017-yilda Usmonov ham salomatligi yomonlashgani sabab bu lavozimni tark etgan. 2017—2018-yillarda Oʻzbekiston Milliy paralimpiya qoʻmitasi raisi boʻlgan Umid Ahmadjonov bir vaqtda futbol assotsiatsiyasiga ham prezident boʻldi. 2018-yilning 25-yanvar kuni boʻlib oʻtgan federatsiyaning navbatdan tashqari hisobot-saylov konferensiyasida Oʻzbekiston futbol federasiyasini (OʻFF) Oʻzbekiston futbol assosiasiyasiga (OʻFA) aylantirish toʻgʻrisida qaror qabul qilindi. Oʻzbekiston temir yoʻllari davlat kompaniyasi raisi, bosh vazirning birinchi oʻrinbosari, boks federatsiyasi prezidenti, Oʻzbekiston qahramoni va senator Ochilboy Ramatov bir vaqtda Oʻzbekiston futbol assotsiatsiyasiga ham prezident etib saylandi. 2019-yil 15-iyuldan buyon Oʻzbekiston Respublikasi Davlat xavfsizlik xizmati raisi Abdusalom Azizov bir vaqtda OʻFA prezidenti lavozimida ham ishlab kelmoqda. Assotsiatsiyaning amaldagi va ijrochi rahbari birinchi vitse-prezident boʻlib, bu lavozimida 2019-yil iyun oyidan buyon Ravshan Ermatov ishlab kelmoqda.

Ijroiya qoʻmitasining joriy tarkibi

Abdusalom Azizov — DXX raisi, OʻFA prezidenti.
Ravshan Ermatov — Oʻzbekiston Milliy olimpiya qoʻmitasi birinchi vitse-prezidenti, OʻFA birinchi vitse-prezidenti.
Davron Nazarmuhamedov — Oʻzbekiston Respublikasi Ichki ishlar vazirining oʻrinbosari, OʻFA vitse-prezidenti.
Odil Ahmedov — OʻFA vitse-prezidenti.
Guy Kiala — OʻFA texnik direktori
Odil Abdurahmonov — Oʻzbekiston Respublikasi Prezidentining maslahatchisi.
Adham Ikromov — Sport vaziri.
Toʻlagan Isoqov — OʻFA Futbol faxriylari kengashi raisi.
Abdurashid Joʻraboyev — MTRK raisi.
Baxtiyor Hakimov — „Oʻzbekiston havo yoʻllari“ milliy aviakompaniyasi bosh direktori.
Sodiqjon Turdiyev — Mahalla va nuroniylar vazirining oʻrinbosari.
Jahongir Usmonov — OFK Futzal qoʻmitasi aʼzosi^[1].

Tashkiliy tuzilishi

Rayosat

Ishlar boshqarmasi

Moliya va xoʻjalik boshqarmasi

Tashkiliy-nazorat va kadrlar boshqarmasi

Hududiy futbol assotsiatsiyalari

Hakamlar va nazoratchilar qoʻmitasi

Futzal va mini-futbol qoʻmitasi

Ayollar futboli qoʻmitasi

Bolalar va oʻsmirlar futbolini rivojlantirish qoʻmitasi

Yoshlar futbolini rivojlantirish qoʻmitasi

Milliy futbol terma jamoasini rivojlantirish qoʻmitasi

Yutuqlari

2013-yilning 7-yanvar kuni Shveysariyaning Syurix shahrida Oʻzbekiston Futbol Federatsiyasiga FIFAning „Fair play“ mukofoti topshirildi. Oʻzbekiston futbol federatsiyasining ushbu nominatsiyada gʻalaba qozonishiga OFK vakillari oʻrtasida Fair play ochkolari boʻyicha birinchi oʻrinni egallagan Oʻzbekiston terma jamoasi futbolchilarining minimal sondagi sariq va qizil kartochkalari sabab boʻldi.

Homiylar

2024-yil 12-mart kuni Uzcard shirkati Oʻzbekiston futbol assotsiatsiyasining rasmiy hamkori boʻldi^[2]^[3].

Manbalar

Havolalar

Rasmiy sayti
Oʻzbekiston futbol federatsiyasi AFC.com da (oʻzbek tilida)
FIFA.com saytida Oʻzbekiston profili
Rasmiy veb-sayt (oʻzbek va rus tillarida) (Wayback Machine saytida 2021-09-18 sanasida arxivlangan)
Oʻzbekiston futbol assotsiatsiyasi Facebook sahifasi
Oʻzbekiston futbol assotsiatsiyasi Telegram sahifasi
Oʻzbekiston futbol assotsiatsiyasi Twitter sahifasi

[1] OʻFA Ijroqoʻmining yangi tarkibi tasdiqlandi

[2] „UZCARD O‘zbekiston futbolini rivojlantirish yo‘lida muhim qadam tashladi“.^{[sayt ishlamaydi]}

[3] „UZCARD O‘FA va PFL rasmiy hamkoriga aylandi“.

[1]

[2]

[3]